次世代生活圈：少女GaGa專業Dreamer

愛發白日夢，是不少人對90後的感覺。在Ruby的自我簡介中，首句就寫着「以Dreamer為正職」，但她絕不是癡人做夢。她一身「潮look」，透過參與時裝活動及攝影比賽，追尋自己的時裝夢。縱然曾遭家人反對，又被批評想法不切實際，她仍堅持自己，「我哋呢代有好多自己諗法，但唔係得個諗字，真係會去做」。

粉紅色眉毛、染白頭髮、黑色眼影、七彩飾物……今年二十一歲的Ruby最愛七彩服飾及佩戴「大碼」飾物，從頭到腳有超過十種以上的顏色，造型誇張，猶如「少女版Lady GaGa」。

在旺角街頭，Ruby總會引來途人的奇異目光，「已經慣咗喇！出街時聽過唔少難聽說話，例如『呢個人係咪傻o架』？『咁似鬼嘅』？以前嘅我無咩自信，聽完會唔開心，但都決定保持自己嘅風格，我又唔係無着衫，只係同大部分人唔同啫，如果唔係咁着就唔係我啦﹗」

潮格形象，令她漸為時裝界人士熟悉。去年，她獲Lady GaGa造型師Nicola Formichetti及著名時裝博客韓火火邀請，參與造型拍攝；今年英國文學學士畢業，認識了藝人卓韻芝，更獲邀為對方兼職設計全身造型。「屋企人見到我嘅堅持同成績，都好支持我，希望有日可以成為潮人Icon」。

遙不可及的夢想，在90後身上，也可以是近在咫尺的事。