SUN微博：打橫嚟講：人無分國籍，一律慘慘慘

話說前日尖東有名怒漢，查問一對日本籍夫婦：「Are you Japanese？」（你哋係唔係日本人？）醒目嘅佢哋梗係知道，呢排風頭火勢，即時答：「NO！」點知，嗰位怒漢仍舊葉問上身，使出連環拳，將丈夫狂毆於其妻前。

咁呢，喺香港地，打日本仔，係絕對唔值得支持嘅。嗱，唔好又以為係啲唔入流分析員、評論員呃稿費嘅廢噏，講咩咩和平理性非暴力冷靜克制，又或者甘地馬丁路德金之類喎。

如果有件蛋散，問都唔問，囂囂張張咁直接行入你屋企，仲瞓埋上你張床度，你應唔應該打佢？當然係要……睇清楚邊個啦。嗰個原來係你丈母娘的話，唔睇僧面都睇佛面，自然唔郁得；即使係一個誤打誤撞的純種盲毛，都好應該體諒佢無帶眼出街。總言之，暴力都係睇吓幾時用、對邊個用之嘛。

何況，釣魚島呢壇嘢，兩國政府大員都拆唔掂，我哋都無開佢拖啦，點解要搵個名不見經傳嘅小人物開刀呢？兩國人民打來打去，統治者就坐山觀虎，最後坐享其成，咪咁笨實至得o架！

正所謂「給我三千城管兵，一定收回釣魚島；給我五百貪腐官，保證吃垮小日本」，釣島問題假如戰場上解決，中國贏就贏硬啦，但係我哋呢啲平民百姓，理你係咩國籍，華僑定日僑，咪一樣冚家慘當災！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk