政壇：專資會生日高官搞棟篤笑

雲集「梁粉」嘅香港專業資深及行政人員協會（專資會）六歲生日，前晚喺灣仔會展開香檳搞盛會，身兼該會榮譽顧問嘅特首梁振英（CY）都率領一眾高官到賀，包括食物及衞生局局長高永文、財經事務及庫務局局長陳家強、律政司司長袁國強、發展局局長陳茂波（Paul）及教育局局長吳克儉。五個高官四個係「專資人」。佢哋仲趁呢個場合大吐苦水，大談做官後去街怕、食飯驚，連碌卡都唔敢儲分嘅慘況！

人才濟濟嘅「專資會」出高官外，又新出爐六個立法會議員，難怪一手培育「專資會」嘅CY致辭時特別祝賀該會「六六無窮，生生不息」。晚宴破天荒有場超級版「與司‧局長有約」，吳克儉盡訴心中情，話做官後出街唔敢再着T恤，碌卡時要叮囑對方唔好幫佢入分，坐飛機又拒儲飛行里數。

阿Paul就自爆唔敢亂咁出席朋友飯局，即使好友邀請都會查問同枱有乜人，差啲令人誤會佢擺款。高永文仲搞笑，話最輕鬆係同政務司司長林鄭月娥遊船河，雖然係巡魚排視察膠粒污染情況，但係樂在其中囉。