政壇：本報漫畫靚吳文華勁冧
立法會秘書長吳文華（Pauline）月底就會退休，尋日秘書處就搞咗個午餐會歡送佢，有百多個立法會職員出席，Pauline嘅接任人陳維安都係座上客。一眾職員送上一份非常貼心嘅驚喜禮物畀Pauline，原來係一本輯錄咗《太陽報》同《東方日報》政壇及政情版插畫嘅紀念冊，Pauline收禮時笑得好窩心。
原來Pauline一直都好欣賞呢啲政治插畫，Pauline話，雖然漫畫嬉笑怒罵、有讚有彈，有時將佢畫做財神，有時又畫佢係燈膽，但無論漫畫係翳佢定讚佢，佢都咁鍾意喎，事關最鍾意我哋將佢條腰畫到幼一幼，望住條纖腰，咩氣都消晒啦！
Pauline話，收到漫畫後非常雀躍，即刻禮尚往來回送一人一個杯蓋，皆因立法會工作繁重，但人手不足猶如「十隻杯得七個蓋」，希望日後大家做到一頭煙嘅時候，都會用得着喎，莫非佢想暗示接任人陳維安要落力爭取增加秘書處人手？
陳維安（右）代表秘書處職員向吳文華送上一本輯錄咗東方報業政治漫畫嘅紀念冊。