政壇：泛民工資騷獻醜

泛民主派喺剛結束嘅立法會選舉爆發嚴重內訌，丟失議席已經令好多選民心寒，本來以為泛民喺選舉過後痛定思痛，最少喺啲非政治性嘅民生議題上合作多啲，點知尋日多名候任嘅泛民議員首次就最低工資水平舉行聯合記者會，就再次爆出公開暗寸盟友嘅不快事件，人民力量嘅慢必陳志全再次同泛民成員唱對台戲，白鴿黨胡志偉更即時面都黑晒，睇嚟泛民喺未來四年仍難免拳來腳往，繼續一盤散沙！

公文袋人影都冇

民間爭取最低工資聯盟喺選舉前向各黨派候選人做問卷調查，結果大部分泛民候選人都支持聯盟建議，將法定最低工資水平由現時嘅二十八蚊，大幅調高至三十五蚊，但白鴿黨同公文袋就只建議增至三十三蚊。聯盟尋日舉行記者會公布有關調查結果，六名泛民候任議員出席撐場，包括支持三十五蚊嘅工黨張超雄、慢必、街工梁耀忠、民協馮檢基同新同盟嘅范國威，支持三十三蚊嘅白鴿黨就派出胡志偉列席，公文袋就人影都冇。

六名候任議員之後輪流發言，張超雄、梁耀忠、馮檢基同范國威都係各自表述，無因為兩蚊之差而單打胡志偉，不過喺選舉期間多次攻擊民主黨政改立場嘅慢必，發言時就暗批白鴿黨唔支持三十五蚊，即係無企硬力撐基層勞工，胡志偉愈聽愈黑面。事後胡志偉大呻慢必咁做好唔啱，強調佢哋嘅立場係爭取最低工資不低於三十三蚊，並無反對三十五蚊。

同樣畀人力狙擊過嘅民協馮檢基，會後再次呼籲不同泛民黨派以大局為重，唔好再搞分化，又強調自己喺民生議題上亦可同人力合作，真係講得輕鬆，睇吓幾時又到你畀人辱罵出賣民主同出賣基層？