SUN奇古怪：Sun潮語：走數

做生意邊個未試過被人「走數」？明明用盡了努力，明明事事都不計，仆心仆命咁做起件貨畀客，然後個客收咗貨之後一個唔該唔畀錢就撇咗去，逃去無蹤。呢種商業詐騙行為一般稱之為「走數」。當然，叫雞唔畀錢或食霸王餐等，都係「走數」嘅一種。不過，在潮語中「走數」就不一定同數字和錢銀有關。

潮語「走數」泛指某人信誓旦旦應承了別人嘅事，但最後沒有兌現承諾。好似好多政黨競選期間，都話如果選佢，就一定會同你爭取乜乜物物……結果你選咗佢之後，佢就只會跟住指令喺議會做投票機器，理得你死。呢頭出賣完市民，嗰頭又話成功爭取，無恥無極限。以前政綱嘅承諾，可以當粉筆字抹晒，呢啲就係潮語所謂嘅「走數」，或者可以叫「數已走」。

另一個解釋就係跟別人輸賭，輸咗就即時潛水消失唔派彩。網上討論區，好多時有啲好無聊嘅輸賭，例如有人會留言話：「如果林峯攞到全宇宙最受歡迎歌手，我切J！」結果係，林峯成為宇宙最強，然後留言者當然潛水無影，其他網友就會瘋狂恥笑他「走數」。

記得早輪特首選舉期間，幾位候選人都許下好多競選承諾。當選的特首，真的欠市民及其支持者很多「街數」要找。希望他千萬不要「走數」，因為精明的香港人追起數上嚟唔係人咁品，隨時暴動都有份。另外，奉勸特區領導亦唔好諗住可以「拖數」，現在香港水深火熱，愈拖只會愈難收科，唔好等啲市民日日响公司門口，等你出嚟「講數」。