政壇：IT豪千元短片助選

仲記得「IT豪」譚偉豪喺○八年立法會選舉前，使咗二十二萬買下電視廣告時段播放宣傳短片《IT達人Talk》，最後以三十五票險勝對手莫乃光，取得資訊科技界嘅議席。莫乃光喺選舉結束後入稟法院提出選舉呈請，質疑IT豪冇將嗰筆廣告開支計入選舉開支係違反選舉條例。雖然終審法院喺五月尾裁決莫乃光敗訴，話當時IT豪仲未宣布參選，所以嗰批形象推銷廣告唔使計入選舉開支，IT豪先可放下心頭大石。

搵義工放上網

今屆莫乃光挾住特首選委會資訊科技界「票王」之稱捲土重來再次挑戰IT豪，仲揚言要報上屆選舉一箭之仇。曾形容選戰係「五五波」嘅IT豪唔敢怠慢，繼續拍片宣傳自己功績。不過，熟讀《選舉申報條例》嘅佢雖然唔會再因拍廣告而墮入法網，但就話見過鬼都怕黑，今次拍完幾段宣傳短片後淨係放上分享網站YouTube算數。

對比上次燒銀紙大賣廣告爭曝光，IT豪今次嘅「有問必答」短片簡直係蚊型製作。皆因佢會喺網上收集網友提問，搵義工拍片後再用電腦軟件將短片剪輯兼放上網，成個製作費一千蚊有找，可謂相當經濟實惠。佢話團隊幾乎每日都會上載短片，包括承諾繼續喺立法會推動民主、反對任何洗腦式國民教育等宣傳短片。

佢又透露團隊現時正在開發新手機程式吸引一眾走在時代尖端嘅科技人，又賣關子話唔少新橋將會喺日內揭盅，但強調全部都係低成本製作。呢啲咪叫做心中有鬼囉，睇嚟佢對四年前嘅往事仍猶有餘悸。