政壇：潘佩璆唔慣一頭烏卒卒
選舉大戰將至，唔少政圈中人都搞個新look，讓選民眼前一亮，工聯會嘅王國興今年轉戰港島，排名單第二名嘅潘佩璆就整咗個新形象登場，原來佢將一頭白髮染黑，後生幾歲爭取選民支持，點知因呢次「造假」竟鬧出笑話。
王國興團隊尋日開啟咗個名為「工道．仁心」嘅社交網站，片中可見任職精神科專科醫生嘅潘醫生一頭華髮變到「烏卒卒」，佢透露個頭係用一次性染髮劑染黑，不過拍完片後佢就即刻想變番白髮，仲足足洗咗五次頭先還原，當日原本約咗老婆都被迫遲到。
參選港島區嘅仲有曾鈺成、鍾樹根、葉劉淑儀、劉健儀、陳家洛、何秀蘭、單仲偕、劉嘉鴻、勞永樂、許清安、吳文遠、吳榮春及何家泰名單。