政壇：張建宗搵女車神過橋

今年由於係雙學制交匯年，暑假前後離開學校的學生約達十一萬人，無論係升學或就業，青年人面臨嘅壓力都好大，勞工及福利局局長張建宗尋日撰寫網誌，講到第二季青少年失業率上升時，佢竟然以奸招嚟解畫，攞舊年暑假青少年失業率高達百分之十點五，嚟印證今年嘅百分之九點七已經好好喇，比下唔比上已經夠唔知醜，點知佢仲轉個頭又大肆抽水，用啱啱喺倫敦奧運攞咗凱林賽銅牌嘅李慧詩嚟激勵青少年要有夢想，張局長呢頭先示範冇咁衰已係好，嗰頭又要青年人要有夢想，真係自打嘴巴！

「只怕你沒有夢想」

今年離開中學嘅青年人大增，已經為第二季失業數字帶來壓力，而青年人口嘅失業率亦明顯增至近一成，喺失業失學嘅雙重打擊下，青年人的確需要更多扶持，不過張建宗尋日喺網誌卻一派淡定，以舊年暑假更多人失業為由，企圖沖淡社會關注。

講到唔少青年人走進職場，佢亦話，青年人搵第一份工係唔容易嘅，亦聽過一啲僱主投訴，話有啲年輕人求職時驚與人溝通，甚至臨時「甩底」，佢認為有啲年輕人可能缺乏自信，甚至被過分保護，但亦有更多青年人懂得開創自己嘅人生路。

講講吓，佢更以有「牛下女車神」之稱嘅李慧詩接受訪問時嘅說話嚟勉勵青年，即「每個人都有自己的潛能，只怕你沒有夢想」。張建宗搏命掹車邊，目的都係借青年偶像作人辦，但佢明唔明，青年人嘅夢想好多都同學業、工作密不可分，政府如果處理青年失業問題繼續求求其其，以未到最壞時嘅心態度日，青年人想有夢想都難喇！