政壇：搞搞政：CY下令八號波照開行會

特首CY梁振英上任後講明要提高行政會議效率，尋日已有第一擊，就係風雨不改照開會。若按以往做法，只要早上十點前仲掛緊八號波，當日嘅行會就會取消。但尋日到十點十分先改掛三號波，當大家估計會停開行會之際，一班行會成員竟然十點半準時到達特首辦開會。原來係CY九點鐘已落咗柯打，話預計十點鐘會落波，希望大家十點半去開會喎！

行會成員張志剛話CY向以勤力見稱，早已估計只要唔係橫風暴雨，以CY性格都會照開會，所以一早出咗門口到中環返工，如果收到行會秘書處柯打，再去特首辦開會都冇乜問題，唔會好狼狽。

另一行會成員李慧琼亦話早就喺屋企整裝待發，九點鐘收到柯打，就算掛緊八號波都衝出門口，以免塞車遲到喎。由於趕唔切叫的士，就叫咗老公做柴可夫司機，車佢去特首辦開會，佢仲話今次唔單止顯示到CY勤力嘅一面，仲顯示到成個行會團隊好「齊心」，因為尋日只得好少人冇去開會。