政壇：食神堃帶隊深水埗開餐
前高官兼馬會大董葉澍堃（Stephen）識飲識食，前晚佢就同太太約埋港大校長徐立之、副校長周肇平及譚廣亨夫婦、新聞處處長黃偉綸夫婦、信興集團副主席蒙德揚等一行十二人組隊去深水埗搵食。原來徐校長曾經係深水埗之友，當年家住牛池灣，朝朝早五點鐘逼車去深水埗返學，難怪今次去福華街嘅「容記小菜王」開飯，別有一番滋味在心頭。
Stephen帶路，容記老闆易偉容亦無甩拖，先奉上皮脆肉嫩、肥瘦適中嘅米芝蓮燒肉畀大家開開胃，再上香口嘅「椒鹽壹嘴」（墨魚嘴），接住係一味「清水浸飛雞」，畀大家試吓味鮮且甜嘅走地雞湯，入口鮮甜，搞到徐校長都忍唔住埋爐邊偷吓師，飲完湯就輪到四斤重嘅古法頭抽蒸鯇魚出場，肉質嫩滑之餘，仲完全無泥味，食到大家都直豎拇指。
葉澍堃夫婦（前左二及一）約埋徐立之（前中）、黃偉綸夫婦（後左三及左一）、蒙德揚（前右二），齊到容記搵食。