政壇：政商定格：耀才葉茂林D場慶iBond豐收
耀才證券尋日喺主席葉茂林間的士高，搞iBond發行慶功宴。咦！佢哋為乜要為iBond慶功？經葉茂林講解，即刻明白晒，原來係因為iBond呢個產品為佢哋增添三千個新客。
葉茂林話耀才喺iBond發售嘅短短兩個禮拜內，吸引咗成六千個客選擇用耀才，當中有一半仲係新客，佢見班員工喺嗰期晚晚做到成十一、二點至有得收工，點都要慰勞吓班同事。
佢依家經營緊三間的士高，尋日用嚟慶功嘅Magnum Club開咗一年多啲，旺丁又旺財，佢就最鍾意間吧夠就腳。所以話葉老闆真係好有生意諗頭，以今次慶功為例，既可以宣傳一下耀才努力開拓客源嘅成果，耀才依家供緊股，咁樣可以畀到投資者多啲信心，又可以借機會宣傳埋旗下嘅的士高生意，稱得上係一箭雙鵰。
