政壇：區載佳甩底避風頭

特區僭建風暴愈演愈烈，要數今期政府大紅人，相信非屋宇署署長區載佳莫屬。佢唔單止要處理自家僭建問題，仲要幫舊老闆煲呔曾、唐唐同孫公拆解一個個僭建炸彈，以為終於捱到換屆可以抖番吓，四個月前計劃定尋日幫商界環保協會主持開幕禮，作為連任署長嘅頭炮活動，順道同業界、商會打好啲關係，勢估唔到新政府上場幾日，僭建炸彈爆唔停，唔知係咪因為咁，搞到佢尋日要臨時甩底避傳媒，難為班公關要幫佢拆彈。

累公關被噓爆

商界環保協會早前獲可持續發展基金撥款，通過焦點小組、研討會同工作坊、訂定《企業可持續發展指南》等，鼓勵建造業界推行可持續發展政策，長遠提升競爭力同企業形象。唔知區載佳係咪見到僭建風波嚴重影響特區政府嘅管治威信同形象，想趁機取經促進政府可持續發展，今年三月已經一口答應主辦單位出任開幕禮主禮嘉賓。

但新任特首梁振英、食物及衞生局局長高永文等問責高官，近日陸續被踢爆大宅僭建，呢幾日被稱為「好打得」嘅政務司司長林鄭月娥，亦不停為班高官解畫，講到口水都乾埋，強調只係無心之失，同誠信無關，不過外界嘅反彈情緒仍然好強烈。

可能區載佳都聞到味，擔心會畀大批傳媒狙擊，尋日朝早突然決定甩底唔去開幕禮，而大批想追訪佢嘅傳媒慘食白果，可憐班公關要即時更改嘉賓名單同流程補鑊之餘，仲要畀班傳媒噓爆。

其實區載佳避嚟有乜謂呢，正所謂「醜婦終須見家翁」，反正遲早都要出嚟交o架啦，畀人話你避走咪仲無謂！