政壇：搞搞政：許曉暉梁鳳儀踏升官跳板

政府架構重組方案仲喺立法會拗緊數，唔止影響新班子，仲有一啲等上位做新設局長嘅人，由於呢場戰事分分鐘拖到年底，政府尋日公布兩個副局長任命，就被視為應變招，依家出任民政事務局副局長嘅許曉暉同財經事務及庫務局副局長嘅梁鳳儀（Julia），更疑似踏上彈板，為下一着升官鋪路。

許曉暉早前已被傳出任新設立嘅文化局局長，外間爭議聲中，都有文化界人撐佢，回想吓佢當年隻身踩入維園同班憤青對話，事後仲請各人飲汽水兼合照，淨係「唔怕落區」呢點，已經合晒問責局長要接觸市民嘅要求。

答應留任做財爺嘅鬍鬚曾未必會做夠五年，一旦提早離任，極有可能係由新架構通過後嘅財政司副司長陳茂波頂上，而財經事務及庫務局局長陳家強就會擢升做財政司副司長，如果真係咁嘅話，接任陳家強個局長位嘅大熱人選就非Julia莫屬。