政壇：淪「無證人士」王紹爾喊苦
煲呔曾臨尾放軟手腳，累到唔少參加回歸十五周年活動嘅政商人士好麻煩，日前鬧出單派發活動入場證件過程亂晒龍嘅事件後，前臨時立法會議員王紹爾都主動致電本報喊苦，仲話慘變「無證人士」，依家望天打卦都唔知有無得參加回歸紀念活動。
有小二之稱嘅王紹爾話，當局今次派發活動入場證件嘅安排「極之混亂」，原本喺六月初已派邀請函叫大家回覆係咪出席回歸紀念活動，點知到六月下旬，當局又重複同樣步驟，最諷刺嘅係過咗回覆日期先收到封信件，搞到佢事後三番四次向有關政府部門交涉，但一直都未有明確答覆係咪可以出席活動。慘變「無證人士」嘅佢又話，基於出席回歸活動係佢嘅權利，所以佢仍然會到活動現場試吓入唔入到場喎，難怪佢都自嘲好似「大肚婆等生仔」咁款！