政壇：泛民抽CY水唔經大腦

連日來候任特首CY梁振英嘅山頂大宅被揭發有僭建物，多名泛民主派議員即時化身正義之士輪流抽水，建議喺特首選舉落敗嘅唐唐同白鴿黨主席鐵頭仁，喺下星期前向選舉事務處提出選舉呈請推翻結果。不過，有心水清嘅政府官員恥笑泛民話，其實四月二號已係提出選舉呈請嘅最後限期，泛民今次未搞清楚就胡亂抽水，真係自取其辱。

人民力量「大舊」陳偉業尋日鼓勵喺選舉中被揭僭建地下王宮嘅唐唐提出選舉呈請，而白鴿黨「高達」李永達就話唐唐當初就係因為僭建而搞到民望插水，白鴿黨會盡快決定會唔會叫鐵頭仁提出選舉呈請喎。不過，由於特首選舉涉及大量憲制及法律程序，提出選舉呈請嘅限期只有七日，就算立法會及區議會都只係得三十日呈請限期，並非如泛民所講有三個月限期咁多。

大舊知道抽錯水後惟有以笑遮醜，跟住又無啦啦話會入稟法院要求酌請延長選舉呈請嘅申請喎。不過，大舊都算好，反而高達就更加唔知醜，知道實情後只係回應話：「係咩！」跟住行咗去就算。