政壇：夢熊大師鐵批建制邪鬼

今年鄉議局主席到沙田車公廟為香港求到嗰支籤就提到：「何為邪鬼何為神，神鬼如何兩不分」，套落特首選舉之後嘅香港政局，真係準到你唔信！

立法會前日喺多位建制派議員「作反」下，令到優先審議新政府架構重組嘅決議被否決，候任特首CY梁振英七月上任，肯定要以「殘陣」應對挑戰。CY嘅忠實支持者、有「夢熊大師」之稱嘅全國政協委員劉夢熊都睇唔過眼，尋日接受訪問時就拆解呢個政治亂局，講到底咪又係班建制派議員同現屆政府執包袱前玩嘢，各懷鬼胎，企圖一拍兩散囉！

現政府冇箍好票

夢熊大師直指事件反映到貪曾嘅夕陽政府未能配合新政府達至無縫交接，現屆政府冇做好箍票工作，先會搞出咁嘅局面。佢點名批評幾位唔肯配合新政府嘅議員，包括投咗反對票、向來唔鍾意CY嘅金融服務界議員詹培忠、缺席則有早已預期會退位嘅體育、演藝、文化及出版界嘅霍震霆同金融界嘅李國寶，話佢哋唔會盡心盡力幫忙喎。

佢仲特別點名批評投反對票嘅旅遊界謝偉俊，話佢準備參加九龍東直選，需要站在道德高地，顯示獨立性。但謝偉俊否認投反對票同參選有關，只係重視程序公義喎。唔單止咁，大師仲話前日喺決議案否決後「Ｏ晒嘴」嘅政務司司長林瑞麟，橫掂都冇得撈，所以對下屆政府嘅事抱住「不在其位，不謀其政」嘅心態，種種原因，終令CY當選後首度受挫。

講到底，建制派議員學人講立場或做逃兵，結果搞到人唔似人、鬼唔似鬼咁，完全係神鬼如何兩不分。CY前日被揭屋企有僭建物，夢熊大師就話，事件顯示CY「係人，唔係神」，公眾唔能夠要求CY句句都係真理、事事正確喎。