政壇：曾蔭權貪腐累妻掩耳快閃
煲呔曾貪威識食，幾次外訪都住總統套房，又貪盡海陸空，仲幾乎會入住深圳「禮賓府」。佢老婆曾鮑笑薇尋日出席活動，再被追問貪曾啲衰嘢，佢一度用手掩住耳仔。
曾太尋日以香港紅十字會會長身份，頒獎畀舊年捐血最多嘅市民，但佢姍姍來遲，又極速頒完獎閃人。貪曾深圳「禮賓府」已被迫退租，七月一日會搬去邊？曾太咁多家當又點處理呢？記者連串追問，曾太都拒答。
喺進入會場時，佢對所有問題都充耳不聞，曾索性用右手掩住右邊耳仔，個樣仲幾唔耐煩，有啲黑面，好急步就入咗去，離開時亦只係講咗幾次：「多謝大家關心。」
