政壇：搞搞政：Jeffrey玩洗腦硬銷經濟動力

點樣先可以成功推銷品牌？其中一種廣告策略就係洗腦式咁重複品牌個名。身兼經濟動力召集人嘅立法會議員Jeffrey林健鋒尋日就示範咗呢招。

話說財爺鬍鬚曾尋日喺立法會財經事務委員會講經濟近況同短期展望，班議員見財爺親自嚟到都踴躍提問，Jeffrey亦唔例外。Jeffrey話希臘政府畀人話佢淨係使錢，冇儲備至搞到咁，「希臘嘅敗筆係冇經濟動力，香港有經濟動力，市民好支持經濟動力要加強，政府點樣令我哋經濟動力更強？令我哋嘅投資、經濟、就業好？」

短短幾句說話，Jeffrey都可以重複四次提到「經濟動力」，hardsell到不得了，連在場人士都忍唔住笑，後來更因為佢嘅發言太冗長，委員會主席陳鑑林不得不叫停佢，留番啲時間畀財爺回應。