政壇：陳文綺慧父女服務東華
東華三院新主席Viola陳文綺慧同東華有着千絲萬縷嘅緣分，事關佢爸爸文洪磋喺六二年擔任東華總理，只有幾歲大嘅Viola經常跟爸爸出席「東寅會」，同其他總理嘅小孩打成一片，而文家仔女當中，原來係哥哥文肇偉最先做東華總理。
Viola喺○四年加入東華，都係多得「靈芝大王」老公陳宇齡推波助瀾。話說陳宇齡做咗三年總理，佢一心想發展中藥事業，當年嘅主席再三游說後，佢於是提議太太「代夫出征」做總理，Viola一口答應，從此就同東華難捨難離。Viola屈指一算，爸爸喺五十年前做總理，冇諗過半世紀後，由佢做主席，感覺非常奇妙。
陳文綺慧（右一）代夫陳宇齡（左二）做東華總理之後仲做埋主席。