政壇：網民諷白鴿絕食快閃

呢排港鐵事故頻生，但根據可加可減機制年年票價有加冇減，令全港市民憤怒。白鴿黨呢兩日發起「絕食為民生，反對港鐵加價」行動，由包括胡志偉在內嘅幾個區議員分別喺全港各區絕食，而咁啱佢哋就係計劃出選立法會嘅人選，惹起網民非議。

網民Tony Lam話「呢個運動好特別，輪流絕食」。Kokkin Chan就揶揄「每人絕食四個鐘，真係陰公豬」，仲反建議佢哋「可唔可以進取啲，晚飯後絕食十小時」亦有網民唔畀面，直斥佢哋「純粹表演博上鏡，沒有任何犧牲，一丁點實際效果也沒有」。

胡志偉急急澄清，話佢哋嘅絕食行動絕對係貨真價實，好似佢就由前日朝早十一點絕食到尋日朝早十一點，足足二十四個鐘，而喺尋日結束絕食後就遊行去港鐵總部，仲遞交咗喺街頭收集嘅二萬五千個市民簽名，反對加價，又話收到風，港鐵會增加優惠，如果街坊都係唔收貨，佢哋就會有進一步行動喎。

街坊嘅眼睛係雪亮嘅，如果佢哋以為用「食快餐」嘅方式，做吓騷就贏得民意，咁就太天真喇。