政壇：搞搞政：林鄭張震遠 風雨同路捱揼

有好打得局長之名嘅林鄭月娥，尋日就喺風雨交加之下，同市建局主席張震遠一齊落區探望居民，宣傳首個由業主主導嘅重建計劃，唔知係咪近期高調反擊鄉議局對新界僭建村屋嘅言論，林鄭顯得有啲唏噓，話佢同張震遠嘅工作都惹來唔少爭議，亦受過唔少批評，仲爆張震遠試過畀人扯爛西裝褸添，不過，呢對經常畀人揼嘅拍檔卻冇氣餒，仲繼續並肩作戰添。

做過梁振英競選辦主席、重新返回市建局工作嘅張震遠早前曾勁讚林鄭工作出色，希望佢過渡新班子，明撐拍檔，尋日就輪到林鄭反撐張震遠，不但一齊開記招，仲一齊落區。林太喺記者會致詞時，突然話當年、講往事，自爆○七年上任之後冇耐，因為市建局項目受到唔少市民反對，令佢同張震遠都好唔開心，講到呢度，佢忽然收網，話今次嘅重建項目受到市民歡迎，佢大感安慰。

林太之後仲接受市建局邀請、同張震遠一齊落區，當時天文台已經發出咗黃色暴雨警告，呢對最揼得拍檔仍然先後探訪咗兩個舊樓住戶，真係唔怕風吹雨打噃！