政壇：發叔擬棄立會保行會位

政府換屆在即，行會、問責局長都名單滿天飛，鄉議局過去一年風雨飄搖，主席劉皇發嚟緊可唔可以繼續做行會成員呢？據聞發叔想保留自己行政會議成員個位，仲唔排除以立法會鄉議局功能組別個議席嚟交換添！

發叔尋日話，就新界村屋僭建一事會尊重法律規定，承認有村民已經向政府登記村屋僭建物，又話唔使咁急，最遲九月三十日先到期喎，立場同早前大講「新界人唔怕犧牲」、「流血」時似乎有啲軟化。據知，發叔早幾日出席立法會會議時，突然透露萌生退意，有意嚟緊九月將自己鄉議局功能界別議席讓出，畀其他人接棒。有鄉議局中人話，發叔今次未必係吹水，有可能讓位畀副主席張學明。

事關原本想喺新界東出選嘅張學明，今次可能要讓路畀嫁入公民力量嘅沙田區議員龐愛蘭，近日仲已經四出放風話自己唔會參選添，既然學明有機被西環逼退，發叔咪想交棒囉，消息人士就話，發叔已經向西環表達留任行會嘅意願，據稱反應尚算正面，目前仍積極協調當中。