政壇：富貴黨爆退黨潮散散哋

唐唐喺特首選舉中落敗，一直撐唐兼一度鼓吹投白票嘅富貴黨選後都散散哋，據聞最近爆退黨潮，除黨常委李應生外，盛傳司庫李子良同創黨成員丁午壽都意興闌珊，打算離開呢個老家。如果傳言屬實，本已重傷嘅富貴黨睇怕更難收復工商界失地。

富貴黨喺特首選舉時不理中聯辦勸告強行投白票，已令中聯辦憤怒，唔少做緊大陸生意嘅黨員因而想同黨劃清界線。啱啱喺特首選舉後退黨嘅李應生，既係前區議員，又係香港中藥業協會理事長，佢係著名中藥商「百成堂」話事人，同唔少藥房稔熟，喺批發及零售界有一定交情同影響力，佢退黨好有可能影響現任批發零售界議員方剛能否連任。聽聞李應生都想好嚟好去，就算退黨，都會繼續幫方剛拉票喎。

最令富貴黨頭痛嘅係退黨潮未見停止，傳司庫李子良同創黨成員丁午壽等都有意出走，例如李子良，早前明明講過佢會同成班黨高層一共八人一齊見候任特首CY梁振英，但偏偏前日見CY時就獨欠佢，令佢退黨傳聞甚囂塵上。現任富貴黨司庫李子良係黨嘅大掌櫃，專責幫自由黨周圍籌款吸水，可惜我哋到目前為止都聯絡唔到李子良。

至於丁午壽近年雖只係掛名做黨員，不過據聞佢都私下同過其他黨友呻，話如果富貴黨講啲嘢太過偏向基層，佢都好難同班商界交代。佢係創黨成員，所以黨嘅榮譽主席田北俊都有挽留佢，或者事件仲有彎轉。加埋早前我哋寫過香港進出口汽車商會會長羅少雄有意過檔經濟動力，富貴黨真係散散哋。