政壇：泛民特首初選 工黨騎劫曝光

泛民主派超額取得二百個選委議席，肯定有特首選舉入場券，特首參選人白鴿黨鐵頭仁同民協馮檢基話要將明年一月八號嘅泛民特首初選搞得有聲有色。其實泛民特首初選，真係有點兒小圈子選舉中嘅小圈子，事關除咗白鴿黨、民協同公文袋參與外，其他泛民只係隔岸觀戰。

泛民初選當日會喺全港七十二個港鐵站設投票站，大抵都係啲人流暢旺嘅站，有心投票嘅泛民支持者，到時自不然集中喺呢啲站出現，既然有咁多客仔出現，識得搵食嘅政團仲唔聞風而至，準備食住呢次初選爭取曝光？

吼實東鐵沿線同將軍澳

好似新成立嘅工黨，為咗爭取支持，備戰明年立法會選舉，據聞佢哋準備喺初選當日，去沙田大圍設街站大搞宣傳，派傳單、介紹理念或嗌咪等，呢邊廂泛民支持者投完票，另一邊廂工黨就可以乘機自我宣傳，呢架順風車確實唔搭就走寶。

點解會揀大圍呢？咪就係為咗工黨副主席張超雄囉。張超雄出年極有可能循新界東出選，大圍係東鐵同馬鐵交匯點，做宣傳仲唔啱晒？佢尋日話正準備研究吓○八年立法會選舉新界東嘅票站調查，睇吓點樣部署好，初步打算集中喺東鐵沿線同將軍澳做工夫，但當務之急就係為工黨籌款先，事關三軍未動糧草先行，依家佢喺新界東連辦事處都未有錢開。

同樣冇參與泛民小圈子選舉嘅社民連亦密謀坐順風車，佢哋今日開會研究狙擊初選嘅細節，示威、企街站都會考慮。社民連喺區選一鋪清袋，再唔擸番啲泛民支持者，出年立法會選舉就閉翳咯！泛民各政團本來就鬼打鬼，呢次擺明係要藉騎劫初選博曝光啦！