政壇：林公公急洗底 種票疑雲翻舊帳

涉嫌區選種票嘅雪球愈滾愈大，搞到政制及內地事務局局長譚志源火羅味極濃。之所以話譚志源火羅，係因為五年前審計署已經鬧過，佢只係幫升咗做政務司司長嘅「林公公」林瑞麟執蘇州屎囉。

五年前筆舊帳畀人挖番出嚟，但林公公一直置身事外。咁又難怪，貴為司長日理萬機，連撲滅罪行委員會都要兼顧。尋日佢開完會，出嚟褒獎咗委員會幾句，提醒大家年近歲晚要小心防盜之後，跟住就突兀地將話題扯到去種票。

出事賴選民多咗

當時連記者未開口問佢，佢就自爆○六年審計報告後，當局已經檢討跟進過，而且內部規定咗，一戶有七個或以上選民的話就會跟進核實，當年仲跟進咗不下八十宗個案，只不過發現大部分係老人院、鄉村或者宿舍。有記者追問點解依家又會出事，佢賴選民多咗，又話佢做局長之初，選民人數二百九十萬，依家已經超過三百五十萬。

咁講，都係想話當年佢有做嘢啫，咁點解今屆突然多咗咁多投訴呢？跟住有記者問鄉議局火燒政府發嘅僭建警告信單嘢，但佢一句就卸番畀發展局，跟住又講番種票問題。

嘩！佢擺明係掛住幫自己洗底，懶理下屬嘅死活啫！佢係咪唔記得咗自己紮咗職，要管晒所有政策局。回想當日，佢做政制局長時已有人嫌佢人工高，話要瓜分佢嘅薪水，依家佢做埋司長，但仲係做上一份工，恐怕更加多人排住隊要瓜分佢份人工。