政壇：律師會尋求零的突破

香港律師會現任會長何君堯及前會長王桂壎都有參加選委選舉，兩個人雖然循唔同界別參選，但對下個月十一日嘅選舉卻似乎睇淡。王桂壎更話，律師會喺選委選舉嘅結果隨時影響到佢明年係咪參加立法會法律界選舉添。

上屆法律界選委選舉，泛民候選人一舉取下全部二十個席位，雖然律師會都有派人參選，但就全軍盡墨。今屆法律界選委席位增加十個到三十席，律師會都好積極參選，分別派出十二人及十五人兩張名單，而且平均年齡只有三十幾歲，擺明就係想實現「零的突破」，王桂壎都有落場，佢尋日大潑冷水，話如果佢哋嘅名單攞唔到一半議席，就唔會玩立法會喎。

至於本身係屯門鄉事委員會主席嘅何君堯，就會循鄉議局界別參選，問佢對選情有冇信心時，佢就搖頭嘆息，一副不欲多談嘅樣子，鄉議局界別二十八個席位，但有三十人出選，我哋早前都講過，鄉議局主席劉皇發有協調選舉，何君堯同發叔一再交手，今次選委又撼過喇。