政壇：高永文多潮州美食回憶
潮州美食多，骨科名醫高永文尋日喺理工大學一個研討會上大講潮州食品，不過高醫生覺得依家都好難搵地道嘅潮州食品，因為唔少美食已失傳，或者失去昔日嘅味道，佢更話喺香港搵唔到一間合佢心水嘅潮州菜館，即使經常幫襯嘅潮州菜館，亦要「指導」廚師先啱佢胃口。
身為「家己冷」嘅高醫生話，童年時食過父母炮製嘅潮州美食，至今仍印象深刻，可惜佢童年食嘅無米粿，依家返到潮州亦無復昔日嘅味道，而市面十分常見嘅煎蠔餅，通常都係薯粉生粉特多，蠔肉、雞蛋又特少，仲要伴酸醬嚟食，口感認真麻麻。佢話，潮菜之中特別多海鮮，例如門鱔本來係又腥又多骨；學名馬蹄蟹嘅鱟本身殼多肉少，但潮式烹調亦可將呢類甲殼生物嘅鮮美發揮得淋漓盡致。
高永文