政壇：鄭威濤睇好米蘭站唔沽貨
經營二手名牌袋嘅米蘭站上市就快半年，大家都關心幾位基礎投資者會唔會趁聽日禁售期完結，沽咗手持嘅股份。作為米蘭站最大基礎投資者嘅和之味飲食集團（經營板長及板前壽司）董事總經理鄭威濤，尋日就話冇諗過呢個問題，仲話：「唔提我都唔記得呢件事添」。
米蘭站上市時十分威水，唔單止成為「超購王」，掛牌當日重逆市大升65.86%。半年眨吓眼過咗，米蘭站尋日嘅收市價就有啲失威，收市報1.43元，低過招股價1.67元。鄭生話唔會沽貨，查實係咪個價表現麻麻？佢話唔關股價事，話買股票係投資，仲話個人對呢個行業有信心。
米蘭站禁售期聽日完結，鄭威濤話冇諗過沽咗手持嘅股份。（資料圖片）