政壇：搞搞政：林公公齋噏搵妻女遮醜
政務司司長林瑞麟喺政壇出名係「人肉錄音機」，講嘢毫無新意，成日淪為笑柄。佢尋日出席「制服團體日2011」開幕典禮時，就因為致詞勉勵一眾制服團體嘅學員時，搞到要搬老婆同囡囡曾參加紅十字會活動嚟為自己遮醜。
多個制服團體尋日喺維園舉行大匯操，林公公擔任嘉賓，佢致詞時大送高帽，大讚制服團體講求紀律，講得頭頭是道，點知林公公話鋒一轉，自爆完全冇參加過制服團體活動，但太太同囡囡就參加過紅十字會嘅活動。
講無可講下，林公公更攞三十年前喺政府運輸科做嘢時，曾經負責交通安全隊嘅撥款工作一事，夾硬同制服團體拉上關係。其實，冇做過制服團體成員，都唔會妨礙佢做活動嘉賓噃，林公公咁樣左拉右扯、拉埋家人扮同制服團體有淵源，反而仲失分。
