政壇：搞搞政：醫界選委戰 蔡堅撼七君子

區選今日殺埋身，政界另一堆人卻忙於為下月十一日嘅特首選舉委員會選舉籌謀，近期曝光頻頻嘅醫學會會長蔡堅據講更想一箭雙雕，既為選委亦為明年立法會醫學界選舉試票。據講，蔡堅最近四出拉攏業界醫生埋堆，爭取以高票當選醫學界選委，佢嘅動作勢同由骨科醫生高永文組成嘅「七君子」鑽石名單形成相爭之勢，睇嚟醫學界或有一場龍爭虎鬥。

醫管局同醫學界最近就是否聘請海外醫生鬧得面紅耳赤，蔡堅同立法會醫學界議員梁家騮更充當反對嘅「排頭兵」，有知情人士估計，蔡堅喺反海外醫生事件上動作多多，目標之一就係藉此爭取醫學界選委嘅支持票。

據聞多個陣營都想加入選委戰團，當中以高永文嘅七人鑽石名單最為星光熠熠，好似外科專科醫生朱建華、兒科顧問醫生周鎮邦、骨科專科醫生方津生等業界翹楚都喺名單之中，相信會有一定嘅支持。另外仲有西醫工會楊超發及「關懷香港」郭家麒呢兩個選舉常客吖。