政壇：王國安求籤政府「在夢中」

今晚班中小經紀會同政府見面表達多項訴求，其中證券及期貨專業總會會長王國安坦言對會面冇期望，開會前佢同政府求咗支籤，竟然係諸葛神數第140籤，籤詩是「遇不遇，逢不逢，月沉海底，人在夢中。」翻查呢支籤嘅解讀，其中一個解籤係「所問諸事均在虛無縹緲中」。唔通連支籤都暗寸政府對業界現時所面對嘅問題「人在夢中」？

王國安向記者呻，話業界提出好多關乎金融市場安全嘅問題，但都得唔到積極回應。好似輪商要有股票至可發行窩輪，該會○六年已提出，但過咗咁多年，仍然係得個吉。依家港交所提出叫輪商研究提供抵押品嘅可行性，輪商就話技術上唔可行。

佢想反問吓，以前都試過，點解依家唔得？事實上，外國都有例子證明係做到。至於輪商話抵押品價值變動好快同點樣計算等，都令技術上出現困難，佢就更加反感，話正正因為現貨波動大，至有衍生工具推出，讓市場對沖風險，減低波動，輪商依家咁講豈非「自打嘴巴」？佢好想政府清楚話畀業界聽，依家香港想要嘅係賭博定係投資市場。