闖荷里活要有自尊 Jessica C.：唔會同人瞓！

我細細個已經好鍾意演戲，會喺屋企同兩個妹妹玩角色扮演，就好似做戲咁，每一次都玩得好投入。對我嚟講，演戲唔只係一份工作，仲係我嘅興趣。因為覺得演戲好有趣，而且係一個學習過程，會學到好多新事物，透過演繹一個角色，揣摩角色性格，表達唔同情感，令我可以更深層咁去認識自己。我希望我嘅屋企人可以喺美國睇到我嘅演出，我想佢哋以我為榮，唔想令佢哋失望。

積極進修圓夢

我唔係成長喺一個好富裕嘅家庭，媽咪以前為咗送我入模特兒學校訓練，花咗好多錢，所以我好多謝屋企人對我嘅付出同支持。我嘅目標好明確，會堅持自己嘅夢想，如果唔踏出第一步去爭取，永遠都唔會得到想要嘅嘢。我知去荷里活發展一啲都唔易，但係我會盡力去做。

今次去美國同上一次過去最大嘅分別係，之前嗰次係「我想做啲咩……」，而今次就係「我將會做啲咩……」，我比之前更加認真，方向亦更加清晰，唔再係想同計劃嘅階段，而係真真正正去實行。我依家喺美國修讀緊一啲演戲嘅課程，想學好多嘢，令自己不斷進步。

我喺嗰邊有試鏡，有電視節目，好似真人騷，亦都有獨立電影。無論演咩角色，都一定要識得抽離，分清楚演戲同真實，如果唔係就會迷失。除咗上堂學演戲，我仲睇咗好多書，學習點培養同表達唔同嘅情緒。

我希望有一日可以演出一部感動人心嘅電影，傳達一啲正面嘅訊息畀人。我知道喺達到目標前要行嘅路好長，我唔介意辛苦亦唔介意酬勞多少，會一步一步嚟，為自己嘅理想努力。我都聽過有啲女仔會為咗換取工作機會而同人應酬甚至同人瞓，但我自己絕對唔會咁做。我唔會走捷徑，做一啲違背自己原則嘅事，唔會同人瞓嚟換取演出機會，我要有自尊。好彩我未遇過有人向我明示或暗示有呢個要求，如果有我實會一口拒絕佢。我想成為更好嘅自己，做自己想做嘅嘢，希望可以鼓勵到其他人，要相信自己做得到。