政壇：唐唐搬竇裝箱晒名牌時裝

疑似特首選舉候選人「鐵三角」尋日各有活動，CY梁振英去中學演講、唐唐準備搬屋、范徐麗泰則上京出席全國人大常委會議。

辭咗政務司司長一職成個月嘅唐唐，尋日睇嚟開始搬屋，將佢嘅細軟搬離白加道官邸，只見有工人將一共十幾袋嘅意大利男士高級時裝Zegna嘅紙袋搬上車，又運走一大疊用衣架掛住嘅長褲，仲有兩架搬運公司嘅大貨車運咗好多吉嘅紙皮箱入去，睇怕都係將屋內嘅衣物用具裝箱。唐唐需於本月三十號之前，將官邸交還。

CY就去咗間中學演講，勉勵學生做人除咗要關懷身邊嘅人，地球上仲有好多人都值得佢哋去關懷。佢尋日用英文發言，話做人最緊要識三個C，包括係「competition（競爭）」、「connectiveness（聯繫）」同「care（關懷）」，但佢將第一個字讀咗「completion（完成）」，差啲跟唔到佢嘅講話內容。事後CY被問點睇六四事件，佢猛話自己以前發表過意見，現時冇嘢補充，記者幾次追問都係收到同一答案。

話時話，CY作為城大校董會主席嘅任期已喺上禮拜三屆滿，佢嘅空缺暫時由柯清輝署任。