政壇：雙英落區騷「遲來的愛」
疑似特首候選人CY梁振英同唐唐尋日同一時間去咗深水埗探訪基層，兩人仲不約而同大吹大擂，宣揚佢哋嗰份「遲來的愛」，咁講皆因佢哋曾經分別係行政會議召集人同高官，要關注市民嘅話，都唔使等到今時今日啦。
CY走去通州街天橋底，同住板間房嘅市民分享佢嘅治港理念。佢話每年應該要起三萬五千個公屋單位，令到人人有屋住，三年可上樓。佢仲認為政府應該要重開扶貧委員會、提出十五年免費教育，搞到啲街坊起晒哄話支持佢。
唐唐就出席關社聯盟座談會，佢曾經係扶貧委員會主席，但就不斷被人批評佢扶貧不力。佢尋日竟然厚顏地認叻，話扶貧委員會爭取設立咗交通津貼同兒童發展基金。佢講唔到日後要增建幾多公屋，話要計過條數，睇睇目標喎。至於對十五年免費教育點睇，佢更加係冇答添！
