政壇：大輝塞車缺選工商會
前日喺立法會答問大會「處男」舉牌示威嘅議員林大輝，上至煲呔曾下至立法會主席都冇理到佢，真係瘀爆，原來瘀事唔止一單。
話說前日朝早八點半，立法會工商事務委員會召開本年度首次會議選舉正副主席，建仔黃定光按各黨派協調結果順利當選主席，但原本協調好做副主席嘅大輝一直唔見影，亦冇人幫佢提名，於是公文袋議員提名上年度嘅副主席方剛，其他議員亦冇異議，結果方剛順利冧莊。
大輝尋日話當日佢首先遲咗出門口，之後又遇上返工時間加落大雨，喺入紅隧嘅公主道大塞車，而佢又醒唔起可以託其他議員提名參選，最終錯失做副主席嘅機會。雖然佢好阿Q咁話冇所謂，但對於紅隧大塞車就好氣憤，炮轟當局冇搞好交通。
