政壇：煲呔曾谷爆「早洩」解謎

煲呔曾為人小器喺政圈係公開秘密，有時會口出狂言鬧到人一面屁，最新例子係前日突然惡人先告狀，大鬧人民力量立法會議員黃毓民係「爛仔」，又暗批其表現猶如「黑社會」。點解突然發爛渣？

消息人士話，早前一班示威者借替補機制諮詢衝擊官員，一向容易畀人辣慶嘅煲呔曾已經想開腔反擊，有建制派中人亦聽聞，其實煲呔曾喺撰寫施政報告時本來有段感性說話，重點正針對激進民主派嘅所作所為，但由於篇幅太長所以刪咗，點知前日畀人稍為挑釁就忍唔住將怒火發洩。可惜發洩時間唔啱，冇等「長毛」梁國雄掟埋雞蛋就發火，搞到變咗「早洩」，即提早發洩咁解。

建制派中人仲話，煲呔曾用「黑社會」呢三個字鬧人，可能令市民好反感。其實自詡為政治家嘅煲呔曾，就算鬧人都應該有分寸，事後仲要立法會主席同班官員下屬死撐護主，真係冇好帶挈。