政壇：搞搞政：蘇錦樑跳三級署任財爺

蘇錦樑幾經艱苦先由商務及經濟發展局副局長登上局長之位，相信佢都好珍惜呢個位，但任期仲有八個幾月就完結，莫講話更上一層樓，究竟有冇得留任都冇人知。不過，尋日政府憲報突然露出一線短暫嘅曙光，因為財爺鬍鬚曾喺下禮拜二起離港公幹幾日，宣布由蘇錦樑兼任財爺。三級跳「水鬼升城隍」，總算叫做有得過吓財爺癮，不枉此生。

點解會有咁嘅安排呢？根據過去慣例，財爺外訪或休假時，通常會搵啲資深局長兼任，好似今次咁，理應搵財經事務及庫務局局長「傻強」陳家強兼任。就算傻強同鬍鬚曾一齊外出公幹，亦未輪到蘇錦樑做，過去就試過由發展局局長林鄭月娥兼任，不過咁啱林鄭又喺嗰段時間率領代表團出席芬蘭赫爾辛基舉行嘅世界環保樓宇會議，所以先至由咁「嫩口」嘅蘇錦樑署任。

不過，話說回來，鬍鬚曾曾經推出「史上最廢」預算案，對多次金融危機又後知後覺，將財爺個位交畀醜聞多多嘅蘇錦樑玩幾日，希望冇衰嘢發生，否則佢都坐得唔安樂。