政壇:潮人胡炎松推介西貢私房菜
身為潮州人嘅胡氏成豐集團第二代傳人Anven胡炎松自細喺西貢長大,家族生意大本營亦喺西貢。佢前日中午就約埋哥哥、西貢區潮州同鄉會理事長胡艷光,喺區內聞名嘅金喜餐廳聚腳。大家一邊歎靚女老闆娘Babi精心炮製嘅新派私房菜,一邊傾吓潮人潮事,開心到唔捨得散席。
Anven話金喜原本係一間茶樓,當年客似雲來,點心小食好味到不得了。幾年前由Babi接手後,搞搞新意思,變身為新派fusion私房菜。
Babi熱情推介法式海鮮盤、川椒炒大蝦等私房菜,眾人未起筷先起哄,事關美食以成個鐵盤上碟,勁似開大食會,襯晒西貢鄉郊漁村嘅簡樸風情。
西貢潮人團結一致,感情融洽。左起:黃信明、胡炎松、胡艷光,右一為金喜老闆娘Babi。
「金喜」海鮮盤