「紅魔女」陳嘉桓 功夫Keeper打擂台

新一代打女陳嘉桓（Rose），由電影《葉問前傳》到最近嘅《競雄女俠—秋瑾》都打到飛起，09年仲攞過香港公開武術錦標賽銀牌添，唔講唔知，原來佢除咗鍾意耍功夫之外，對足球都相當有興趣。今日《太陽體育》就搵嚟佢大玩功夫、足球Crossover，測試吓佢嘅足球天分！

估唔到「小師妹」陳嘉桓係識波之人，因為佢一睇曼聯、巴塞隆拿同皇家馬德里波衫，就知道邊件打邊件，仲識得分主場同作客添，見佢由始至終對曼聯波衫愛不釋手，原來又係「紅魔鬼」死硬派Fans！佢仲大讚植髮後嘅朗尼好靚仔添！

天分高極速上手

「小師妹」打功夫就叻喇，足球又踢過未呢？Rose話細個最怕就係球類活動，因為怕仆親，但自從學咗功夫之後，身體好咗，咩運動都想嘗試。既然係咁，今日小記就同佢先講解吓守龍門嘅基本功，然後再做吓簡單嘅接球練習，果然有功夫底子嘅佢即能極速上手。

身高達1米75嘅佢，對於上三路來球自然能夠輕易化解，至於下三路嘅射門呢？「小師妹」話因為練功夫都要紮馬，下盤最緊要穩，果然一樣冇難度喎！眼見Rose喺度左飛右撲，表現神勇，即時令小記諗起《少林足球》嘅阿梅，話唔定有朝一日香港女子足球隊都可以諗諗，邀請佢加入，或者可以創造好成績呢！