政壇：聲討警濫權 歐耀佳激過80後
港大百周年慶典搞到一鑊泡，校友齊心聲討校方同警方，今次連唔少老校友都走出嚟發聲，激過唔少80後。
當中八三年醫學院畢業嘅聖母醫院副行政總監歐耀佳，前晚參加港大集會，發言已點名炮轟煲呔曾、政務司司長唐唐同警務處處長曾偉雄唔尊重言論同集會自由，其後佢同班學生行落西區警署，一出校門口就因遊行路線問題同警察口角，見到有警方近距離拍攝遊行情況，佢更加扯火，指住警員大鬧：「你做乜影我，你依家侵犯我嘅私隱！」又叫個督察交出警員編號，要去投訴咁話。
唔少學生見佢咁好火，即刻走埋去幫口鬧埋一份。查實歐醫生一向對社會運動好熱心，當年佢母校福德學校因收生不足面臨殺校，佢已經大鬧政府政策有問題。
歐耀佳（右）指住警察大罵，旁邊嘅勞永樂都勸佢冷靜啲。