政壇：葉文斌未畢業先落區
青年組織「青年區動」副主席Terry葉文斌，身為80後大學都未畢業已經開始做地區工作，近年仲積極喺屯門兆翠選區做嘢，據聞好大機會喺嚟緊區議會選舉挑戰白鴿黨嘅現任區議員。
由於工作關係，Terry平日同女友甚少見面，幸好女友好支持佢做地區工作，就好似今年農曆新年，佢扮成財神咁款落區同街坊拜年，女友為咗以示支持，亦着起中國傳統服飾同佢、大班義工玩埋一份。
做咗咁耐地區工作，Terry遇過唔少感動事，記得有次落完區後趕住搭巴士去北角開會，當時係傍晚六點幾鐘，咁啱畀個相熟街坊撞到，對方知道佢未食飯，突然轉身行咗去。佢初頭唔知乜事，點知臨上車之前個街坊就急急跑過來，原來對方跑去買咗袋麵包畀佢，搞到佢感動到唔知講乜好。
大學未畢業，葉文斌已開始做地區工作。