栢芝開口數臭霆鋒

【娛樂組報道】轟動演藝界的謝霆鋒與張栢芝的婚變風波愈演愈烈。近月在婚變事件中被形容為貪錢、霸道、無理取鬧……的張栢芝，在沉默二十四天後絕地反擊，昨日身在德國工作的張栢芝接受本報獨家專訪，首度開腔回應事件，指摘丈夫謝霆鋒是幕後黑手，不停放料攻擊她，目的是不想她分身家；她為了兩名兒子一直啞忍，奈何霆鋒得寸進尺，令她忍無可忍，才站出來揭開霆鋒的真面目，她怒斥霆鋒「唔好再喺度扮好男人、好爸爸！」「鋒芝婚變」相信已成定局。

記：記者　張：張栢芝

記：點解覺得係謝霆鋒爆料？

張：我嫁咗佢五年，由十八歲識佢到依家三十一歲，我點會唔知佢係咩人？佢一直喺度扮有型，大家睇佢成日戴住黑超就知。我曾經問佢，點解成日都戴住副黑超？佢話戴咗之後，講真話同假話都無人知，所以佢攞影帝真係要鼓掌！

借刀殺人我好不齒

記：你有無一啲實質嘅理由，令你確定係謝霆鋒放料？

張：（激動）好多嘢只係我兩公婆先知，係兩公婆嘅對話嚟，根本無第三者知道。霆鋒同拉姑嘅關係一向唔好，謝霆鋒攞影帝嗰陣無多謝佢（指拉姑），第二日拉姑同查小欣訴說，之後拉姑就一直無同我哋聯絡，亦無嚟過我哋屋企坐過，好似我搬咗去陽明山莊、交幾多個月租，拉姑根本完全唔知，但點解查小欣會講到出嚟？邊個放料好明顯，呢啲借刀殺人嘅方法，令到兩個女人（指拉姑與栢芝）畀人圍攻都完全唔理，呢種做法，我好不齒，有乜嘢咪行出嚟講，點解要咁鬼祟？

記：查小欣講嘢到依家，差唔多一個月，期間有咁多負面消息，點解你一直唔出嚟解釋？

張：（語帶無奈）我一直啞忍嘅原因，係為咗頭家，我唔想兩個仔喺破碎家庭、單親家庭成長，但佢唔心領，到咗尋晚我上機之前，佢仲喺度放緊料，我真係忍無可忍喇！要企出嚟講嘢！

當兩個仔好似透明

記：有無同謝霆鋒聯絡過？

張：（斬釘截鐵地說）我呢個幾月嚟都搵唔到佢，上機之前，我用無來電顯示電話打過畀表哥（霆鋒的助手），我同佢講，你老細再咁樣放料法，我唔可以再忍喇！我只好將佢嘅真面目揭開，話畀人哋聽謝霆鋒究竟係一個乜嘢嘅人，唔好再喺度扮好男人、好爸爸！

記：霆鋒係一個點樣嘅爸爸？

張：佢好少理兩個仔，喺屋企都當兩個仔好似透明咁，無理佢哋，佢只係想叫我生仔嚟困住我，佢根本唔鍾意小朋友！

記：你話要揭開霆鋒嘅真面目，霆鋒有乜嘢反應？

張：（激動）佢喺電話旁邊講：「你咪講×我，我鋪排咗咁耐，整到你形象咁差，睇吓啲人信邊個囉！」

記：佢呢句說話係咪你忍無可忍嘅導火線？

張：（憤怒）係！就係因為呢句說話，我決定唔再啞忍，要企出嚟講嘢！

離唔離婚係後話

記：謝霆鋒點解要攻擊你？

張：佢唔想我分佢家產，所以整到我形象好似好貪錢咁，但事實根本係兩回事，我唔需要靠佢！錢對我嚟講，多有多使，少有少使，我依家又唔係無錢，就算唔做娛樂圈，我都無問題。

記：事情已經去到呢個地步，係咪決定咗離婚？

張：（無奈）我啞忍咗咁耐，就係為咗頭家、為咗兩個仔，所以離唔離婚呢啲係後話，依家呢一刻，我只係想揭開謝霆鋒嘅真面目。