政情：肥根話新抱唔使走水貨
被揭發屋企僭建天台玻璃屋嘅建仔立法會議員「肥根」黃容根，近日又有爆料人話佢二仔嘅老婆，用咗佢名下部有中港車牌同埋立法會徽章嘅座駕，不時走iPhone、iPad、貴價紅酒、黃金甚至鑽石返內地，避過兩地邊境人員嘅檢查。爆料人仲好仔細咁詳解每次走水貨嘅過程，同埋一旦畀人篤爆時嘅甩身方法添！
記者向肥根求證，佢話部車連司機都係佢嘅，新抱平時根本好少用，一來新抱冇兩地車牌唔揸得，二來個司機平時已經要忙住接載肥根自己，只係幾個月一次會用嚟車孫女往返內地。肥根仲話新抱以前係做金融出身，根本冇需要靠走水貨搵真銀喎。