政情：張樹槐難忘搵克林頓簽名

有冇試過攞本自己鍾意嘅書搵作者簽名？恒生銀行助理總經理Walter張樹槐就有類似經驗，仲好深刻，事關幫佢簽名嘅係美國前總統克林頓。

Walter話同克林頓有兩面之緣，都係發生喺克林頓卸任後，第一次係佢嚟香港參加啲大企業搞嘅社企活動，大家有握過手。第二次嘅會面其實係Walter有心製造出嚟，因為佢知道克林頓嚟香港出席一個活動，於是決定拎克林頓本自傳去畀佢簽名，但當時有好多人圍住克林頓同佢傾偈，咁Walter惟有企埋一邊等。

Walter喺個紙袋攞本書出嚟，當時同第二個人傾緊偈嘅克林頓，突然伸手捉一捉Walter隻手，似乎係要話畀佢知要等等，轉頭幫佢簽名咁。

Walter記得當時呢位前總統冇正面望到佢，但克林頓幫佢簽名時，竟然喺本書度，寫埋「To Walter Cheung，With appreciation」，Walter好感動，仲覺得克林頓好勁，只係用眼尾「睄吓」佢心口個名牌，就寫得出佢個名，完全冇串錯字。