政情：鄧永鏘冇份觀皇室大婚
英國威廉王子同未婚妻凱瑟琳喺禮拜五大婚，已公布咗嘉賓名單，素來同英皇室有交情嘅本地名人鄧永鏘卻冇被邀請，佢尋日語帶酸溜溜咁話：「唔會去英國，都冇請我，幾千人都冇請。」咁有冇唔開心？佢話唔會，仲話：「我係同戴安娜友好，同佢個仔威廉都係朋友，不過呢十幾年，佢有自己嘅朋友，希望佢呢段婚姻將來好成功，好Happy。」
戴庚玲讚王子親民善良
另外，Juno前女友，擁有中英混血血統嘅模特兒Janine戴庚玲，曾喺英國留學，佢話認識嘅英國朋友對皇室都有負面感覺，但佢個人對王子觀感唔錯，覺得王子親民又善良。佢仲隔住電話問英國籍嘅媽咪對王子大婚點睇，又引述媽咪話：「佢話英國人普遍唔贊成王子大婚，係因為覺得保安都花費成數千萬英鎊，覺得太浪費，佢話就算佢喺英國都冇興趣去睇。」
鄧永鏘同英皇室素有交情，但冇獲邀參觀威廉王子大婚。 （資料圖片）
戴庚玲對威廉王子觀感唔錯。 （資料圖片）