政情：搞搞政：肥龍日本睇歌劇凍過水

前政務司司長「肥龍」許仕仁係歌劇迷，做官嘅時候，都經常抽時間飛去倫敦、紐約聽歌劇，退出官場後更加沉迷。早排佢本來訂咗去日本睇歌劇嘅飛，行程亦計劃好晒，點知日本九級大地震後核危機曠日持久，到家吓都未搞掂，分分鐘連累佢嘅日本歌劇行，搞到肥龍好似一盆冷水兜頭淋咁。

肥龍透露，紐約大都會歌劇院早已計劃今年去日本公演，早喺日本大地震前，佢就已經買好晒飛，計劃六月去日本睇表演。可惜一場大天災，搞到佢嘅大計吊吊fing，據講家吓紐約大都會歌劇院班演員肯唔肯飛過去日本表演都未知，要等到五月至有公布，所以肥龍都好心急。

佢話，只要個演出繼續，佢一定會飛過去日本睇好戲，即係話自己並唔驚輻射，最驚係唔開騷啫。唔講唔知，肥龍退休後，一直定期去東京觀賞文藝表演兼品嘗美食，即使發生咗大地震，佢都打算捧場無間斷。