政情：盧奕基齋做公關半夜去接客

煲呔曾以高薪請番嚟嗰隊「八國聯軍」副局長同政治助理，上場兩年幾以嚟，劣評如潮，班立法會議員不時鬧爆呢班政治見習生已經變咗政府負資產，先後好多次叫政府炒晒佢哋。

尋日喺立法會財務委員會特別會議上，又有議員追問請政助係咪浪費公帑？人民力量嘅黃毓民向保安局局長李少光發難，話翻查佢位政助盧奕基出席嘅公開活動，好多都同政助嘅工作冇關，仲逐樣數，例如出席台山同鄉會活動、去建仔活動玩扯大纜、同其他政助參加馬拉松等等，全部都唔等使。擺明係鬧盧奕基不務正業啦！

長毛畀錢李少光補中文

相信大家仲記得國泰包機事件，盧奕基十問九唔知，搞到李少光要幫佢解圍。呢次都唔例外，李少光話毓民講嗰啲活動只係盧奕基工作嘅一部分，佢其實做咗好多嘢，例如半夜三更去機場接日本地震影響返港嘅旅客、去禁區同鄉事委員會委員傾偈等等，好多都係議員睇唔到嘅，咁講對盧政助好唔公平。不過，據李少光嘅講法，盧奕基嘅日常工作，就係迎迎請請，公關主任一名，同政助嘅要求有好大分別喎。

既然李少光話議員睇唔到，咁佢同盧奕基係咪都要透明度高啲，話畀議員同市民知佢哋做過乜嘢，係咪值得每個月十幾萬蚊人工？

呢頭未撲熄啲火，嗰頭社民連嘅「長毛」梁國雄又點火，話李少光中文唔多好，唔知佢嗰句「唔應該用細蚊仔作為抗爭嘅武器」講乜，仲叫李少光補吓中文，最多補習費佢畀；之後長毛又辣向警隊，問係咪胡椒噴霧就快過期，要快啲用晒佢，所以要攞嚟噴啲示威者。

李少光立即轉守為攻，話多謝長毛肯畀錢佢學中文，同時亦話示威演變成暴動會好危險，叫長毛個契女唔好參加；至於被指亂用胡椒噴霧，李少光就用咗警隊一哥曾偉雄嗰句：「你咁講有少少顛倒是非黑白！」