政情：劉吳惠蘭告假五日做手術
尋日立法會財委會特別會議上，有兩個環節一共兩個半小時，本來由商務及經濟發展局局長Rita劉吳惠蘭統領多個部門出席回答議員嘅質詢，但Rita唔見影。原來佢上周五突然告病假，正式病假由尋日起休假到本周五，佢喺休假期間要接受手術，知情人士話以佢告病假五日推算，應該唔係患咗好嚴重嘅病喎！而Rita話多謝大家關心同問候，但就以私隱為由，唔想進一步透露病情。
局長病咗，就由副局長蘇錦樑臨時頂上，佢首先讀出基於時間關係已經準備好嘅開場白，然後就將議員嘅提問，一一分派畀其他公務員同事作答，例如當有議員問到科研問題，佢就叫創新科技署同事回答，問到港台問題時，就叫廣播處長答，總之樣樣都唔關佢事咁。咁點叫做好自己份工呀？