政情：鐵頭仁區選遇十面埋伏

喺舊年政改方案一役後，白鴿黨被泛民主派力斥出賣民主同港人，社民連更表明唔排除喺區議會選舉派人狙擊白鴿黨，就連及後成立嘅選民力量都話會加入狙擊行列，但白鴿黨主席「鐵頭仁」何俊仁扮老定，仲話之前社會上嘅負面印象已經消除，相信選民明白同支持白鴿黨嘅。

社民連早前黨內分裂，立法會議員「大舊」陳偉業同黃毓民退咗黨，但鐵頭仁咪開心住，事關大舊同毓民正籌組另一政團人民力量，大舊尋日喺黨團會議後仲爆響口話，佢哋將會派出五十人參加年底嘅區會選舉，而佢就會做狙擊手，喺屯門狙擊鐵頭仁。

雖則大舊嘅老巢喺荃灣，鮮有染指屯門，但佢同鐵頭仁都係立法會新界西直選議員，仲喺舊年所謂嘅變相「公投」再次重返議會，計知名度都未必輸蝕，呢次走入屯門對鐵頭仁嚟講都有一定嘅殺傷力，鐵頭仁依家嘅處境簡直係四面楚歌。

爭奪「超級區會」入場券

要狙擊鐵頭仁嘅何止大舊，近日收到消息話，白鴿黨喺選舉上嘅死敵建仔都想差雙腳埋去，仲已經物色到人選添嘞！其實，喺鐵頭仁本身樂翠選區，外圍幾個選區都係建仔嘅人，地區工作密密做，想搶埋鐵頭仁嗰區嚟擴大政治版圖，都係好正常嘅部署。此外，聽聞就連鄉事派都想搵人落去撼佢。

依家各路狙擊手十面埋伏，目的顯而易見，事關年底嘅區會選舉關鍵之處，就係攞明年立法會「超級區議會」入場券，尤其白鴿黨內部部署由鐵頭仁參選超級區議會，咁啲狙擊手梗係想喺區選將鐵頭仁連根拔起，咁鐵頭仁冇入場券又點選呀？到時咪可以少個人爭囉，睇怕鐵頭仁依家有得震冇得瞓。